Bisherige Sujets - Guggemuusig RHY-PIRATE 1981

Direkt zum Seiteninhalt

Hauptmenü:

Bisherige Sujets

Schatztruhe

Wie erklär ich's dem Nichtbasler? Motto? Thema? Wie auch immer:

2017: 200 Joor Basler Bolizey2016: 35 Joor Guggemuusig RHY-PIRATE 1981
(Neuer Stamm) Details weiter unten
2015: Waggis-Pirate
(Vandalenakte und Diebstähle auf den Fähren) Details weiter unten

2014:
Z Baasel politisch e Null. Herr Wäber mer bruuche Strääber, nid Sässelklääber
2013: Mir schteen im Rääge
(BVB/BLT Preise und Konkurenz) Details weiter unten
2012: Mir sind gschluucht
(Gartenschlauch-Dusche von Rentnerin für Prostituierte)
Details weiter unten
2011: 550 Joor warmi Luft
(Jubiläum Uni Basel) Details weiter unten
2010: Mir gän Gas
(Erdgas-Gnome)
Details weiter unten
2009: Nid mööööglich... Die ganz Wält isch e Zirkus...
(Finanzkrise/UBS)
2008: DJ Bobo/Vampires are alive
2007: Alte Chinesen/Militär-Ausverkauf
2006: 25 Joor Guggemuusig RHY-PIRATE 1981
2005: Schpaar-Waggis
Details weiter unten
2004: A.I.D.A.
(Au Idiote derfe abschtimme)
Details weiter unten
2003: Wärbe-Bäre
(Mir mache Wärbig für jede Schyssdrägg/Charming-Bär vs. Cola-Eisbär)
Details weiter unten
2002: JAPA02 D' Terzianum-Arteplage im Joggeli
Details weiter unten
2001: Rhy-Läggs-Pirate
(Neuer Stamm)
Details weiter unten
2000: UBS-Vampir  
Details weiter unten
1999: Trapattoni/Flasche leer
(FC Baiern München - Was erlaube Struuuunz...)
Details weiter unten
1998: 101 Dalmatiner (-)
1997: Rückblick/Markthallen-Brand (-)
1996: Neuer Stamm
1995: It's cool man
(Peter Steiner und die Milka-Werbung)
1994: Freiheitsstatue/Waggis+Alti Tante
(Immer mehr Vorschriften an der Fasnacht)
1992 & 1993: Neon-Waggis
1991: Neuer Stamm
1990: Musketiere
1989: Alf
(D'Fasnacht 89 die macht Schpass, es sind 22 Alf uf dr Gass)
1988: Polizei-Waggis (-)
(Bym halte Motor abschalte)
1987: Neuer Stamm
1986: Mir sind aifach Waggis (-)
1985: Radio Basilisk Miss Bikini-Wahl (-)
1984: Alti Tante (-)
1983: Rhy-Pirate
1982: ? (-)

Leider haben wir keine Fotos aus den Jahren die mit einem (-) gekennzeichnet sind...

-------------------------------------------------------------------------------------------------------------------------------------------------------------


Ein paar Sujets im Detail:

Fasnacht 2016:
35 Joor RHY-PIRATE

Syt 35 Joor simmer jetz scho derbyy
und beryychere d Fasnacht mit unsrer Rhy-Piraterie
Aber mir mache kai Angscht mit schaarfe Sääbel
oder versteggen ys gar im dichte Nääbel
Ob Terrordruppe, UEFIFA oder wie sy au allewyyl haisse,
mir finde das Theater, mit Verlaub, so zimlig Schaisse
Mit Sujet, scheene Goschdyym, lute und amme au schreege Deen,
hämmer syt Joore lieber, dass ys d Lyt guet gheere und au gseen
Uff dääre Wält gits scho z vyyl Bandite und ächt beesi Pirate,
do sin mir anderscht und biglaite lieber e Waage             
Zien zämme dur d Fasnacht, fyyre uff dr Gass
und pfyffe uff e Wält us luter Grieg und Hass!
Fyyre unseri 35 Joor mit allne a däm riise Fasnachtsfescht
Egal welli Faarb, Wäärig, Religion oder Haimed du suscht hesch!
Voordraab: Alt- und Jungpirate, wo nimm oder noonig meege im Spiil mitmache aber das Fescht nit verbasse wänn

Requisit: Dr Pirateschlappe, wo nit mit gstoolenem Gold, Gäld oder Juweele gfillt isch sondere mit dääne guete Sache, won e Pirat an dr Fasnacht weermt!
Guggemajoor: Dr Piratekapitän und Stüürmaa, won ys an allne Klippe verbyy stüürt
Spiil: Fasnachtsbegaischterti Pirate, wo nyt anders wänn als e gueti Zyt mit vyyl Spass und beschter Muusig

Fasnacht 2015:

D Waggis-Pirate die sind doo, jetzt isch dr Fäärimaa ganz froo;
d Fääri faart mit Schutz ufem Ryy, jetz isch s fir d Langfinger verbii.


Fasnacht 2013:

Mer steen im Rääge
 Voordraab: Stieri Sieche, wo entweder mien lauffe oder s Dramm mien zie,
  wels z dyyr worden isch.
 Requisit
: s mentscheläär Dramm, wo als wie dyyrer wird und als
  U-Abo-Zoone-Bryys-Lyyche numme halber fusioniiert isch.
 Guggemajoor
: Zwai fusionierti BSBL Oberdrämmler, wo paitscheschwingend au no
  dr letscht Bazze uss em Volgg w
änn uusewoorge und s denn
  iber dr Disch aabewische.
 Spiil
: Noonemool so stieri Typpe wie im Voordraab. Kai Glozz me fyr dr
  Eevau; debbrimiert oder au h
ässig; mit lääre Segg! Si faare halt
  baldemool schwarz, wels nimme anderscht goot.


Fasnacht 2012:
Mir sinn gschluucht
Terasse Wääbergass, ganz gmietlig singgts: „S‘ Rameiers göi go graa-aa-see...."
„Wasser marsch" dr Schluuch isch prall und glyy duets denn gyggse vo ganz undeùffe.
Denn s Marteli hett dr Schluuch in dr Hand – dä fir dr Raa-aa-se,
si hett jezze gnueg vom Lärm, em Drägg und dämm ewige „ummebuffe".
E Gutsch Wasser mit viil Drugg iber d Brischtig
wird augebligglig s gyggse und Zoff erbringe
dr Gutsch sotti fir Rue und Oornig sorge, dasch wichtig
und d Drottwaaramsle zem baldige Abfluug zwinge.
Au wenns is mängisch schluucht,
das uusesprizze hämmer bruucht…

Wenns gnallt am Volta…, uusesprizze,
au s alti Kispi kame…, uusesprizze,
d Dräggsegg an dr Ryyviera…, uusesprizze,
gyyrigi Bängger und Chemyybonze…, uusesprizze,
Fuessballkabuttmachendipseudoopresidänndte…, uusesprizze,
d Lottervilladùùrzuug bim Schlachthoof…, uusesprizze,

Em Subbermaarta vo dr Oggsegass im finfte Stogg, isch gopferdeggel,
dr Graage blazzt und hett sich schuuchend gweert, mit Rächt – so sott me maine.
Numme dr Gass und d Schuggerei saage nai und gänere ains ùff e Deggel.
Hejoo, ùf alti Mammeli loosgoo, vom Muet här isch dr Gass halt ganz e Glaine.
Au wenns is mängisch schluucht,
das uusesprizze hämmer bruucht…
Nootebänggler mit $-Gschäftli…, uusesprizze,
Kaini Stizz fir Kultuur und Teater…, uusesprizze,
Au bim Fümuuaar ischs e Teater…, uusesprizze,
Kaini Rampasse vo dr Regierig am Apéroo…, uusesprizze,
Alles vollgsaicht in dr Innestadd…, uusesprizze,
100 Stuzz fir d Winiette…, uusesprizze,
und am Weloo bruuchts e kaini…, uusesprizze,
derfir e Sprizzehiisli bim Wolf…, uusesprizze,

Uf dr Terasse darf s Marteli nimmi obenaabesprizze
dr Schluuch isch ewägg, d Diire zem Dach isch zue
drbii, es isch doch Sunneglaar
gäbtis no so viil zem uusesprizze

Au wenns is mängisch schluucht,
daaas uusesprizze hämmer bruucht…



Fasnacht 2011:
550 Joor warmi Luft
denn:
Was gisch, was hesch, was wotsch
an d’Uni rennt bald jeede Dotsch.
VOORDRAAB:
Das sinn hundsgemaini Dottelifänger wo dr hinterlischtig Schwoobedozänt bruucht, zem aarmi Piräätli abschlebbe.
REQUISITT:
E gschtrandets Biecherschiff mit subberwichtiger, subwentzionsberächtiggter Lidderatuur fyr d Unilauffbaan vo de aarme Piräätli.
MAJOOR:
E hinterlischtige schwööbischschtämmige Dozänt, wo goot go Dotteli iifange, dermit er sini Voorläääsige no voll bikunnt und er witter sini waansinnig wichtige Kollegie abhalte ka. Zem Bispiil iiber so wichtigs wie: „Die weltumspannende Kommunikation der gemeinen birkenwaldbewohnenden Blattunterseitenassel. (Merggsch eppis???)
SPIIL:
Aarmi Ryypiräätli wo nimme deerfe go anderi Ryyschiffli äntere, well d EU under dr Fierig vo de Schwoobe gäärn uff Pirate goot go Jaggd mache. Und so sinn si dämm eeländige Dozänt ins Nezz gschwumme, aagloggt vo sinere hauchdiitsch voorbrochte Wäärbig fyr e besser Lääbe, mit emene Marschter vo dr UniBASel. (S’Teema isch schissegliich, d‘Haubbtsach isch, de hesch Ain)


Fasnacht 2010:
Mir gän Gas

D Yyskappe schmelze, s Klima wandlet, Dier stäärben us
Stiirm doobe und Blaggete geen em Comité am erschte Daag scho us
Gmäss de Majas isches denn im 2012 sowieso sowyt...
aber z Koppehaage griege unseri Scheffe das alles nid mit
Mir setzen e Zaiche und zaiges de Groosse:
Ab sofort dien mir nur no mit Äärdgas bloose!
Voordraab sin d Voorboote vo dr griene Invasioon
Requisit isch e Naduuräärdgasdanggstell... jetzt miesst me numme no kenne aanefaare
Guggemajoor isch e exilsuechende Yysbäär, wo luegt obs villicht doch no naime en Yysscholle git
Spiil isch e Hoorde gasbenäbleti Waldmännli, wo finde dass grien biutifull isch


Fasnacht 2006:
D Kùlt(ur)schlacht ùff em Rhy

Die „alte Bäbeli" wache ibers Schiff
ùnd hänn d Pirate (multi)kùltiwiert im Griff.
Syt 25 Jòòr mache si Faasnacht puur,
so sin d „Rhy-Pirate" schò fascht Kùltuur.
Zem Schluss dien d „Dänggwäärzli" Kùltuur verwalte,
dènn Bapyyrschiffli duet me au hit no falte.

E Kùltuurschlacht z Baasel ùff em Rhy,
d
oo sinn miir nadyyrlig mit derbyy.
„Dänggwäärzli-Waggis" ùnd „Rhy-Pirate",
„alti Bäbeli Clique"… miir alli waarte,
ùm zämme so richtig dùùre Izstaarte.

D Pirateschiff sinn zwòòr schò lèngscht bassé,
doch ùff em Rhy kasch no diwersi Schiffli gsee.
Ains zem lääse, ains fir d Kùltuur; ains sogar zem pfuuse,
ùnd fir Dùrischte gitts au no Faarte no Milhuuse.

Kùltuur hèt z Baasel e groossi Bidyttig,
das stoot jò dääglig in dr Zytig.
Internazionaal duet ùnser Stadtkùltuurbild stimme,
nùmme (r)ächti „Bèppi" find Isch bi ùns fascht nimme.
Ass die lètschte ächte Bèppi au ùff d Landschaft flichte,
wäärde d Stadtbildkòmisioon und d Styyrverwaltig richte.

Bi dr BeeVauBee hänn si en uusdywidierti Drämlikùltuur,
kèmme nùmme dangg ùmmemùùrggse zer Niiderfluur.
„Combino-Eiforyy" haisst nei drùm pher èxgyysi: „Kùltuurschaade"
ùnd dä isch vo neiùff derbyy, bim kòmisieenele im Simenslaade.
Blòche dènn zwai Combino enander ins Fùùdi – mit ains-komma-drei,
wett mes verhaimlige ùnd verschwyyge – aber s git e riisè Gschrei,
wäge drei Schaadefòtteli im Intèrnet, dènn die sinn vom Waagefierer Heier
ùnd scho holt en – wäge Landesverroot – dr BeeVauBee-Tschobb-Kill-Geier.

Au spòòrtlig wùrd Kùltuur sich m
änngmool loone,
bsùnders wènn dr FCB uns mit UEFA Spiil duet biloone.
Aber s git dèèrt statt Laischtigs Igarantie,        (E Garantyy gits fir Thoschtèr in dr Migroo,
nur ängi Hògger ùnd Yydritts Ibryys Ipiraterie.  [nid vom Gigi, fir Garanti Iie isch die nid doo!)

Kùlturell gits bi uns männg Musèèum ùnd dr Zòlli,
au Mässe hämir z Baasel, g
anz ganz dòlli.
S Kùlturelle isch Piraterie ùnd dient nùmme aim Zwägg,
am Schlùss vom Ganze isch dy Gäld ewägg.

Au d Schwoobe hänn sich kùlturell nei gfùnde,
ùnd vom Schrèèder sich entbùnde.
Fir die bòlitisch Kùltuur wirds nò dr greesser Schògg,
wènn de amene scheene Daag s Anschi gseesch; im Mini-Rògg.

Ooni Yydritt isch z Rieche kùlturell nid wiirgglig èppis los,
kasch hèggschtens gò dèmonschdrierè gege d Zòllfreistrooss.
Allewyyl fir Pirate wùrdi Rieche sich immer nò rèntiere,
dènn die dèèrt wänn au vò de Goldresäärvè bròfytiere.

Yysebaanfaare isch in dr Schwyz Kùltuur,
ùss em Zùùg loot sich gutiere ùnseri Naduur.
Doch in e baar Jòòr ischs dòdrum gschee,
dènn kame nùmme nò Wänd vò D
ùnnel gsee.

Wägenère Stromphannè faart kai Zùùg me ùss ùnd yy,
kùlturell hätti d
aas no viil lènger dèèrfe syy.
D Lyynie Ziiri-Baasel hètti me sòtte stromloos loo,
esoo wòòrde d Ziircher ändligg nimm ùff Baasel koo.

Dr Jüggè Schild – e ha
rrrte Maa ùnd èèrzkùltiwièrt,
hèt als Schuggerei Idiräggter ainscht Baasel regiert.
Sy Rùggdritt kènnte miir wiirgglig loobe,
hätts dr Couchepin graad no mit verschoobe.

In ùnsèrer Stadt dräffe sich e baar Kùltuure
ùnd das hinderlòsst bikanntlig syni Spuure.
So kaasch z Baasel Pizza, Kebap ùnd andèrs ässe,
nùmme d Baaslerkùchi kaasch laider lèngs je mee vergässe.

Dr Novartis Campus wird ainewääg baut
ùnd s Klybeckareaal wird kùlturell versaut.
D Kèm
yy duet ùndereschuufle, dasch Piraterie,
dènn nei
i Arbeiter stellt dèèrt gwiis kaine yy.

Ùffem Einheits Istuel dringge mit Kùltuur isch inn,
aber miecht die Baasler Gschtaltig wirgglig Sinn?
D Bòlizeistùnd sòtt me au loo blyybe,
me mues jò nit alles iberdryybe.

In dr BaZ kaa me dr Wurzel laider fascht nimme gsee,
was isch nùmme mit däm kùlturelle Wauwau gschee?
Hèttèn dr lang vermissti Pitbull ùss dr Zytig gfrässe,
òder hèt men en in dr Rèdaggziòòn aifach vergässe?

An dr Faasnacht stoosst Kùltuur gòttstreefflig an iri Gränze,
sgitt näbscht Pfyffer ùnd D
ambuure au Gùgge wò schränze.
Ùnd au Faasnächtler wò intrigiere; zùm Dail ùffeme Waage,
aber dääne goots dènn subwenzionèll amme an Graage.

Schysseglyych ob Kiirche, Bòlitigg òder Kùltuur,
goots ùms Gäld, sinn ùffsmool Alli stùùr.
Jeede schiilt ùffs N
ääbedra ùnd mècht bèsser syy,
in ùnserer „Kult(ur)schlacht" ùffem Rhy.

Fasnacht 2005
Spaare, spaare........, wo fiert
das ganze numme aane


D’Rhy-Pirate das isch wòòr
fyyre bald scho 25 Jòòr!
Zu däm Aalàss brucht me „dann"
nadyyrlig au e neye Stamm.
Èppis bsùnders mues es syy
do stimme alli yyfrig byy.
Doch èppis bsùnders kòschdet Gäld
s’git  nyt vergääbets uf däre Wält.
So sin miir hinder d’Biecher gange
um unseri Finanze yyzfange.
D’Finanze die stehn gar nit schlächt,
doch fir e neye Stamm brucht’s rächt
mee Gäld als iiblig mues me ghèère,
so mien mir ùnser Kässeli lèère!
Me zèllt und zèllt; oje oje
s’Gäld in der Sau wird eifach nit mee!
So rènne mir verbysse dr Spaarsau no
und das goot nit nùmme uns eso.
Au s’Kòmitee gratzt s’Gäld nid vo de Wänd,
drùm verkauffe sy Blagètte jètz an de Ständ.
D`BVB au die mues spaare
drum mien miir jètz au vyyl dyyrer fahre.
Und au d’EPA das isch wòòr
het nur no ei Filiale sid ändi Jòòr.

Fasnacht 2004
A.I.D.A - Au Idiòtte derfe Abstimme
 
Vortrab:
Das sinn d'Wäärbezettel-Verdailer fyr e antiggeri Schwyz
Major: Das isch unser schwyzer "Anggela". Si isch e'Sklaavedriiber-Häiplinggs-Dechterli wo esoooo gäääärn wotti driischnuure z'Bäärn
Schlag: d'Sklaavedriiber vo dr SVP, wo s'Schwyzervolgg nach hinde paitsche.
Spiil: d'SVP-Götter, wo in Zuekunft z'Bäärn wänn dr'Taggt aagää.
Dr Zeedel:
D‘Basler Fasnacht isch e Hit,
jede Usländer macht freehlig mit!
Denn e Maske ka schliesslig jede trage,
sigs dr Georg W. Bush oder der Osama bin Lade!
Vo Ägypte simmer, us eme färne Land,
Mit Dattelpalme und finem Sand!
Im ene settige Land, das waiss jedes Dotteli,
isch’s fascht so trogge, wie z’Basel im Joggeli!
Drum bruuche mir dert e Halle zum Schwimme,
nur zahle will’s kain, das isch jo ´s Schlimme!
`S Sprochrohr vo der SVP
het das hingege anderscht gseh!
Dert maint d‘ Angie Zanolari:
„Bi de Asylante spar i!
Säll Konto kennt me zwäggs Schwimme ruume,
me bruucht nit alles fir d‘Usländerpfluume!“
Vo dere Idee isch sie weg und hin,
Sie als friehnere Basler-Delphin!
Au Kranggegäld kennt me in Masse spare,
wirde mir d‘ Usländerzahl obenabefahre!
Im grosse ganze dien mir numme gwinne
und am Schluss jo au no prächtig schwimme!
Alli selle haime goh,
dert ane wo sie här sin kho!
Die koschte alli und profitiere numme,“
Doch d’Angie vergisst, das isch jo s’Dumme,
ihre verflossenen Ehemah –
e Souvenir us Domenika!
Doch mit em „Härz uff em rächte Flägg“,
isch dä „Missstand“ gly ewägg!
Drum kha me jetzt us allne Rohre
kräftig schiesse, wie ne Mohre,
me nutzt si Deggig – ganz ohni Witz,
uff em SVP-Präsidänte-Sitz!
doch au e Präsi bruucht si Armee,
das het au unseri Angie gseh.
drum suecht si Lyt fir ihre Clan,
meegligscht gscheiter, als der Durchschnitts-Fan!
Si suecht au no in andere Gruppe
nach geeignetem Salz fir ihri Suppe!
Schliesslig het si aine gseh –
der Widmer Koni, ex LDP!
Kynftig sett är, im Grosse Ganze,
nach der Angie ihrer Pfiffe danze!
Si sait au: „unseri Regierig is(ch) la(h)m
trotzdäm bruuche mir dert kai Taliban
Sowit kämtis nämmlig no
gäbe mir s’Stimmrächt de Fremde do

Z‘Bärn duets dr Blocher fir dSchwyz scho richte
trotz (oder wäge) sinne EMS-Firmegschichte
Nur z’Basel muess me’s halt sälber mache
bevor me iber uns Bebbi no me duet lache.“
Iri Heimet isch zwar s’Bündner Brusio
aber das dien mir do oni Beachtig lo
Fir’s Süsché dien mir als AIDA-Ägypter laufe
E Araber-Bänd wett sich an d’Fasnacht iikaufe
E Ägypterkeenig –wenn au nur e Tote-
duet si Schatz –muesch nid lang roote-
fir 6 Mönet im Antiggemseum niiderloo
do kennt me fascht uf komischi Idee ko:
Vo derte här dien sis villicht brobiere
uns z’Basel mit em Islam z’infiltriere
Zum Glügg hämmer d’Angi und d‘ES VAU PEE
die luege scho das das nid duet gsche.
Mir maine, us em Wüeschteland,
mit Dattelpalme und finem Sand:
„D’Idee‘e sin guet, der Ysatz au
und zielorientiert, bisch Du als Frau!
Nur sett’isch dytlig kritisiere,
am Beschte die, wo hyt regiere!
Wenn dert hi schiessisch, triffsch nit nur Spatze,
dert hets no gfeehrlig grossi Katze.
es wär doch wirglig der nackti Wahn
de braicht’isch e settige Taliban!
Drum schiess dert ane wo sich’s lohnt,
nit nur wo der klai Asylant hyt wohnt!
Sunscht kunnt uff’s Mol der Falschi dra,
irgend e Klaine us Domenika!

Fasnacht 2003
Mir mache Wäärbig fyr jede Schissdrägg!
Wenn de ummsverwoorge e Sujeè suechsch, isch’s mängisch gspässig.
Scho etligi Wuche vor dääre Sujeèsitzig, duesch hirne wie’ne Aff.
Hesch kai Idee, derfiir schloofloosi Nächt und bisch am Morge schlaff.
An dr’Sitzig e zindende Fungge; "ou jä, das isch’s", dr’Gwooteziircher sait: "uulässig"
S’Anni maint: "Mir geen als Bääre", aifach so, oni Grund. Dermit dien miir alli schelle.
E baar Anderi springe uff und kleene: "Jo dasch prima, sone Bäär hani scho lang welle".
Dr’Mägge duet is denn erglääre: "Z’letscht gs’een mir so uss, wie d’Schissibabyyr-Bääre".
"Bi dere Wäärbefluet", maint dr Otti, "isch’s durchuss aabrocht, gäll Lotti"
"Uff jeede Fall isch ains e Daatsach", briielt dr Heini, "unser `yyberheeblig` Radio
hänn si no Ziiri verkitscht, sitthäär isch’s immer schlimmer worde mit dere Wäärbig."
Z’Nacht im Draum isch mer d’Erlyychtig koo, denn dr’Theo-Drache isch aanegflooge,
ganz ney yyglaitet, in Blau und Wyss, mit em Ziiriwappe uff sim Buuch.
Nymme Grien und Gääl mit eme ne Bizzeli Rot; was das ächt soll, due yych mi frooge.
"Wäärbig muesch mache fyr jeede Saich", sait er, "dasch in dr Schwyz dr neyi Bruuch".
"Drum haiss yych jo au nimme Theo-Drache" maint är ganz uffgwielt
Är seigy jetze –well’s Wabbeviich vo Ziiri e Lai isch– dr’"LEO-DRACHE", und brielt.
Schwaissbaadet wach yych uff und due mi draie, winde; ganz glaar isch die Sach:
"DAS ISCH UNSER SUJEÈ", rief yych jetz uff ei mool hell und wach.
D e n n e s i s c h j o w i r g g l i g g w o o r:
("Yych bi doch nid bleed", gheersch s’ganzi Joor)
Wo’d aaneluegsch, wo’d goosch und stoosch, wo’d sitzisch und au wo’d liggsch,
ob’d Autifaarsch, im Drämmli hoggsch, in’s Kino goosch, oder umme Egge spiggsch,
Radio loosisch, ins Tii-Vii glozisch oder z’Nacht im Net gosch go söörfe,
g’seesch numme no die Schisswäärbig, und froggsch di, ob die das döörfe.
Guzi fyr’s Wufferli, das hääääärzige, braafe. Speziell weenig, well’s Wuffi eso glai isch.
Schissibabyyr, sorgfältig g’woobe vo de Schwoobe, sooo waich, dass äs scho gail isch.
Kazekeernli, ganz wyssi wo nid stinge; will wyssi Käzli mit suubere Pfeetli wingge.
Heesliyylaage in alle Foorme & Faarbe, mit deene bisch jeede Daag e anderi Baabe.
Zämmebrässti Abwäschdabledde mit rotem Bolle z’mizt drinne,
nid zem Abwäsche, mit deene kasch dä vo nääbedraa gwinne.
Winterfingge mit Subberprofiil, wo au am Nordpool no dien griffe,
grieni Limbbe mit Ryybelisytte wo de di Baad kasch suuberschliffe.
E Bleeterliwasser wo uff em Rugge Fliigeli loot spriesse,
mit deene kasch denn aanefliege, wenn’d muesch go schisse.
Derzue no Duftiwässerli wo’d kasch drunter sprize,
bis de so schtinggsch, ass’d bim Schisse nymm kasch sitze.
Au wenn de in’s Joggeli hoggsch (das isch jo jetze Moode),
kunnsch dr voor, wie Dehaim voor em Tii-Vii, unglooge.
Yyberal Bildschiirm, Luttsprächer, Blakaatwänd (au am WeeCee-Urinaal),
und was de g’heersch und g’ seesch isch, ob de s’wotsch oder nid, esooo banaal.
Es glèpft dr d’Auge und d’Oore voll, do kasch numme no schnäll flichte und winsle,
bis änddligg di Rue hesch; meegliggscht im Siidpaziifig uff ere ainsame Iinsle.
Alli maches und drum au miir! Wäärbig nuur fyr uns; e Gugge voller lutter Muusig.
Wo sich nid yylosst uff die iiblige Sujee, wo gweerschloot, motzt und unbigwääm isch,
wo gege dr’Stroom schwimmt und macht was si well. Pirate halt, andersch als anderi.

Fasnacht 2002
JAPA 02 - D' Terzianum-Arteplage im Joggeli
Vortrab:
Sinn Binggis wo hoffe, dass si au emol im Terzianum kenne logiere
Major: Dr unermiedlig, stadtbekannti Terzianum-Baumaischter (Steffi Muesfäld)
Tambouren: Sin Alt-FCB-Stars wo mit Donnergrolle versueche iiry Bauarbeiter-kollege z'wegge, demit das Ding an dr EXPO 3002 fertig isch!
Spiel: Sin au Alt-FCB-Stars. Vor lutter Vertaidige gseen si im Alter alli glyych us. Si schpiile und iebe, demit denn an der Ereffnig im 3002 e rächt scheens Schtändeli erdeent. Derno wänn si schyyns uffhere Schutte um im Terzianum numme no uf dr fuule Hutt ummeliige z'kenne (wenn's denn setti fertig sii)!!!

Fasnacht 2001
–Bisch au soooooo rhy-läggst ? –

Z’Basel und im räscht vo dr’Wält bassiert so vyyl, es isch e Gruus
De gooh‘sch nym uff’d Strooss und getrausch di nym us dim Huus.
Iiberaal glèfpft’s, gnallt’s, s’git Stritt, Lämpe, Zwischt und Grieg uff derè Wält.
Hej wie sinn mir froo, dass z’Basel Friide isch, wenn am vieri s’Glèggli schällt.
Mir nämme’s rueig, s’in lièb und nätt; denn ob uff dr‘ Gass oder z’obe im Garte
Rue‘e mir uss, uns règgt nyt uff; hejo, genau, mir sinn halt „d’Rhy-Läggs-Pirate“.
Mir wärde nyd g’fèsslet im Swissair-Fluugi – mir dien halt iiber gaar nyt Mùùre.
Mir kènne au noonig Italiäänisch – drum halte mir bi de Schugger d’Schnùùre.
Und wènn sich dr’Cortège dènn gar nymme verroode loot, dènn isch es glaar
D’Rhy-Läggs-Pirate sinn d’tschuld, dènn mir rhyläggse grad vor dr’Privèe-Baar.
D’Guggemèitscher isch dr’ober-ruèig-langsam-fascht-scho-schloofènd
Rhy-läggs-Pirate-Cäppt‘en
S’Spyyl sin alles usgrue‘eti, bravi, und lièbi
Rhy-läggs-Piräätli

Fasnacht 2000:
D'UBS hett fusioniert
no Transylvanie, s'isch notiert.

D'Spiiler
sinn XX-bluetgäldsuugendi UBS-Monschterdraculas und däppele dumm und brav yyrem fette Oberguuruu hindenooche.
Dr' Mayor
isch dr grossy Zampano, wo alli Fääde in dr Handb'haltet und mit em Bluet vo de glaine Lyt dr' Schärholder-Valiuuuu uffejaggt.

Dr Zeedel:
D‘Gebyyre uffe, d‘Zinse aabe, das isch glaar,
Und dr glaini Spaarer isch dr‘ Naar.
Schòpp di Lappe ùnter d’Madratze, scheen suuber ineSògge,
Dernoo kaasch au im näggschte Jòòhr, ùff em ganze Lappe hògge.
Bringsch en aber dùmm zùr UBS, dien‘s dr‘ zèèrscht è Zinsbròzäntli aanestrègge,
Dernoo zien die Zinslibigger d‘Gebyrè ab, und dim Lappe fäält e Ègge.
Lauff nimme bi dr‘UBS verbyy,
Magnetstraiffe het die Bangg no allewiyyl.
Die dien dyy Gäld vo sälber us dyym Schlùtti lògge
Und Dr‘ Oschpel duet‘s Zoobe gschwind verzògge.
Dr Badroon zaalt dr‘ Zapfe am Frytig, "via Bangg’yberwiisig";dasch mòdäärn,
Dy Glòtz bikùnsch denn scho am Zyischtig, jò so hänn‘s doch alli gäärn.
D’Zinse vo dämm "Wùchenändi", dien d`Bangger b`halte; das duetsich loone,
Denn jedes Jèèrli macht das glatt e baar Mylioone,
Waisch, au s’Oschpeli mues doch aartgrächt woone.
D’Schuggerei macht uns uff Däschediebe uffmerksam.
Jä dasch sicher ganz nùtzlig, doch mir wäärde anderscht arm;
Muesch nùmme bi irgendainere UBS-Filiaale duurelaufe,
schò duet im Sagg vom Oschpel dy Glòtz sich verschlauffe.
Wenn de binere Bangg schaffsch, hesch e Job uff sicher,
Wenn si denn fusioniert, isch denn fertig mit Gekicher.
Denn us fimf Konzäärn-Grippli mache si jètze drei,
Findsch kai neyi Stell, hesch ùffsmool ganz lang Frei.
Y ha em Oschpel e Schùùfle g‘schänggt;
Und ha mer derbyy au èppis dänggt.
Denn wènn aine sich so gschwind ùffebeweggt;
Sòll er emool aafoo flyssig ùmmespatte;
Isch s’Lòch denn fertig, dùnde mit Brätter belèggt,
Duet er sich maischtèns grad no sälber bestatte.
Aktionär syy, jòò das wäärs, dasch kaibelùschtig,
So ne Portofolio, das macht mi glùschtig.
Au brofitierè vom fùsionierè, jò das wòtti,
Mit em Spaarbazèli, vom Dante Lotti.
Hösch Digge, das goot in d’Hoose,
Brofitiere dien doo nùmme die Gròsse.
Hesch e Konto by dr‘UBS, bass ùff,
ùffsmool löst sich di Kiis in Lùft uff.
Die aarme Bänggler, die ghèèrsch gleene,
D’Kèschte, d’Kèschte, ghèèrsch si stèène.
Mir dien fùsionierè, denn kènne mer spaare,
Und sälber glyy è‘ greesserè Kaare faare.
Due di gschwind verstèggè, dr‘Oschpel luegt ùmen Egge,
Daasjòòr dien sogar d’Fagùnzè; (dèèrt dueni gäärn yyneschlyychè)
Iiber dr‘Oschpel è Fäärsli brùnze. (am liebschte ha‘ni Wasserlyyche)
Gäld, Gäld, das duet er iiberaal sueche, sogar no bi de Rambassrueche,
doch dr‘Oschpel isch è Gaawaljee, er stoot wiène Giggel als Bòòrtiee
hinter jederè Diire, und sini Hand luegt usem Hoosèsagg fiire.



 
Zurück zum Seiteninhalt | Zurück zum Hauptmenü